Las unitads d'interpresa da la SSR (SRF, RTS, RSI e RTR) tschertgan cuminaivlamain la chanzun svizra e l'artista u l'artist per l'Eurovision Song Contest (ESC) 2023.
Candidaturas pon ins inoltrar dals 25-08-2022 fin ils 08-09-2022 a las 22:00.
Da princip po mintgina e mintgin candidar. Interpretas ed interprets ch'èn burgaisas e burgais da la Svizra u cun lieu da domicil en Svizra vegnan preferids en cas da paritad dals puncts. La naziunalitad n'è però betg decisiva e n'excluda nagin d'inoltrar ina chanzun.
Da resguardar: La vegliadetgna minimala da las interpretas e dals interprets munta a 16 onns (termin da tagl: 1-5-2023). Sche candideschan minorennas u minorens, vegnan contactadas las persunas responsablas per l'educaziun per dumandar lur consentiment per la participaziun da l'interpreta u da l'interpret.
La candidatura per l'ESC 2023 ta porscha la pussaivladad da participar sco artista u artist per la Svizra a l'ESC.
La procedura da candidatura vegn messa a disposiziun e realisada da las unitads d'interpresa da la SSR. Ellas portan la responsabladad per il dretg davart la protecziun da datas.
Per la candidatura stos ti inditgar a nus infurmaziuns davart tia persuna.
Nus duvrain da tai las suandantas indicaziuns:
Datas da contact
- prenum
- num
- via
- numer postal
- lieu
- numer da telefon u da telefonin
Detagls davart tia persuna
- data da naschientscha
- tia relaziun cun la Svizra
Video da candidatura
- in video, en il qual ins enconuscha cleramain tai
Cun questas indicaziuns registrain nus tia candidatura.
En pli pos ti ans inditgar voluntarmain tia pagina-web u tes label da musica. Ti ans pos era trametter in messadi ensemen cun tes video da candidatura. Questas infurmaziuns n'èn betg necessarias per la candidatura.
Ulteriuras infurmaziuns davart l'elavuraziun da datas persunalas chattas ti en nossa decleraziun davart la protecziun da datas.
Per la candidatura stos ti era far indicaziuns davart la vusch principala, la producenta/il producent, la textadra/il textader e la cumponista/il cumponist. I po mintgamai sa tractar dad ina u da pliras persunas.
Nus duvrain da tai las suandantas indicaziuns davart questas persunas:
Datas da contact
- prenum
- num
Las persunas pertutgadas han dà a tai lur consentiment da communitgar a nus lur datas da contact. Cun auters pleds, ellas san e vulan che ti das vinavant a nus lur datas da contact.
Las datas che ti inditgeschas duvrain nus per registrar tia candidatura, per verifitgar e valitar redacziunalmain tia candidatura e per selecziunar definitivamain la chanzun e l'artista u l'artist.
Tias datas da contact duvrain nus per communitgar cun tai e per t'infurmar davart l'andament da tia candidatura.
Las datas da contact da terzas persunas (vusch principala, producenta/producent, textadra/textader, cumponista/cumponist) utilisain nus per la communicaziun en il rom da la procedura da tscherna.
Participaziun a l'ESC 2023: Tias indicaziuns èn necessarias, perquai che la participaziun a l'ESC 2023 sa basa sin ina procedura da tscherna.
Tias datas na vegnan da princip betg relevadas per auters intents che per la candidatura. La redacziun resalva però il dretg da contactar tai, sco artista u artist, era suenter la candidatura.
Tias datas vegnan duvradas mo en il rom da las unitads d'interpresa da la SSR (RSI, RTR, RTS, SRF). Quai cumpiglia er il servetsch da clients.
Sco referendaria da l'incumbensa survegn la digame GmbH tias datas en connex cun la selecziun da las chanzuns e da las artistas e dals artists.
Nus e noss referendaris memorisain tias datas da princip mo uschè ditg sco necessari per il proceder da candidatura u uscheditg ch'igl è previs legalmain.
La redacziun resalva però il dretg da memorisar tias datas da contact era suenter la terminaziun dal proceder da candidatura per pudair contactar tai, sco artista u artist, era suenter la candidatura.
Sche ti dumondas da stizzar tias datas, vegn quai valità sco revocaziun da tes consentiment. Sche ti revocheschas tes consentiment, vegnan tias datas stizzadas.
En cas da problems u da dumondas pos ti gugent t'adressar a nossa redacziun.
Ulteriuras infurmaziuns en connex cun l'annullaziun da tias datas chattas ti en nossa decleraziun davart la protecziun da datas.
Las datas per la candidatura vegnan elavuradas sin fundament da tes consentiment.
La participaziun da la victura u dal victura da la selecziun svizra a l'ESC vegn reglada cun in contract en scrit. A partir da quel mument vegnan las datas elavuradas cun l'intent d'ademplir il contract.
Ulteriuras infurmaziuns dal dretg da protecziun da datas, tranter auter en connex cun tes dretgs, chattas ti en nossa decleraziun davart la protecziun da datas.
Ulteriuras infurmaziuns en connex cun il dretg da la protecziun da datas, tranter auter davart tes dretgs, chattas ti en nossa decleraziun davart la protecziun da datas.
Ti ans pos gugent era trametter in e-mail: datenschutz(at)srf.ch.