Reglament

EUROVISION SONG CONTEST 2023

REGLAMENT SVIZZER

Stadi: 12-07-2022

SRF, RTS, RSI e RTR (numnads en il reglament «SSR») tschertgan ensemen la chanzun svizra e l’interpreta u l’interpret «Eurovision Song Contest» 2023. Candidaturas pon ins inoltrar dals 25-08- 2022 fin ils 08-09-2022 a las 22:00.

CUNDIZIUNS GENERALAS D’ANNUNZIA

1. La SRG SSR tschertga ina chanzun moderna che correspunda a pretensiuns internaziunalas e sa distingua. Il text duai avair in messadi ferm, cler e chapaivel.
2. Candidaturas ston vegnir inoltradas cun in’audiodatoteca sur la plattafurma uffiziala da la SSR. (srf.ch/eurovision)
3. La candidatura resp. la chanzun po vegnir chargiada si sulettamain dals possessurs dals dretgs respectivs. Mintg:a possessur:a da dretgs po inoltrar maximalmain tschintg chanzuns. Cun far l’upload vegn confermà che mintg:a possessur:a dals dretgs è d’accord cun la candidatura e che nagut n’impedescha la participaziun a la selecziun svizra per «Eurovision Song Contest»
4. Cun far l’upload accepta mintg:a possessur:a dals dretgs da l’ovra il reglament svizzer e las reglas internaziunalas davart l’Eurovision Song Contest da la European Broadcasting Union (EBU).
5. La participaziun d’organisaziuns commerzialas u religiusas sco era d’organisaziuns da nonprofit e da fundaziuns n’è da princip betg permessa.
6. Mintg:a possessur:a dals dretgs garantescha che naginas cunvegnas cun terzs, p.ex. cun labels, managements, organisaturs u agenturas n’impedeschan la creaziun ed il diever da l’ovra tenor contract, la producziun sco era las preschentaziuns. Las persunas che possedan ils dretgs tegnan libra la SSR da tut las pretensiuns da terzs senza restricziuns, e quai objectivamain, temporarmain e localmain.
7. Chanzuns inoltradas na pon betg vegnir retratgas pli tard.

LA SELECZIUN

8. Tut las candidaturas resp. tut las chanzuns vegnan examinadas e valitadas d’ina redacziun. Chanzuns che n’adempleschan betg las pretensiuns da qualitad u las cundiziuns dal reglament vegnan eliminadas. Suenter succeda la selecziun definitiva da las chanzuns e da las artistas e dals artists sur plirs stgalims e pliras etappas tras in panel d’aspectaturas e d’aspectaturs da 100 persunas ed ina giuria internaziunala da 20 expert:as.
9. Manipulaziuns, emprovas da corrupziun u irregularitads tar la votaziun da la giuria u dal panel pon avair per consequenza l’exclusiun da la chanzun, da l’interpret e dal commember da la giuria u dal panel.

PROPOSTA PER CONNEXS TEMATICS U CHANZUNS DA CONCEPT

10. Tar il «Eurovision Song Contest» vai tranter auter era per svegliar las emoziuns dal public e da la giuria cun tractar tscherts temas. Nus animain perquai las cumponistas ed ils cumponists e las auturas ed ils auturs d’inoltrar era texts che tematiseschan eveniments actuals u che provocheschan cun lur cuntegn ina reacziun emoziunala u ina regurdientscha tar il public da l’ESC.

DETERMINAZIUNS DAVART LA CHANZUN

11. Mintg:a possessur:a dals dretgs conferma cun l’annunzia che la chanzun inoltrada è in’ovra stgaffida sezza (cumposiziun/text) ed en nagina moda e maniera in plagiat.
12. Mintg:a possessur:a dals dretgs sto consentir a las determinaziuns da licenza da l’EBU. Quellas fan part da las reglas en connex cun il «Eurovision Song Contest».
13. La chanzun inoltrada na dastga betg esser pli lunga che trais minutas.
14. Ils texts da las chanzuns pon vegnir inoltrads en mintga lingua.
15. La chanzun na dastga betg cumpigliar texts politics u rassistics u texts che glorifitgeschan la violenza.
16. Versiuns instrumentalas na vegnan betg acceptadas. Mintga titel sto cuntegnair passaschas chantadas u discurridas.
17. I pon era vegnir inoltradas chanzuns che n’han anc nagin:a interpret:a fix:a . En quel cas sto la chanzun dentant stringentamain vegnir chantada d’ina vusch da demo.
18. Mintg:a candidat:a vegn infurmad:a enfin la fin dal 2022 davart il resultat da selecziun 2022.
19. Tut las chanzuns che na qualifitgeschan betg, na vegnan betg publitgadas da la SSR.
20. Per motivs da qualitad po la SRG SSR da tut temp pretender sin agen giavisch che la producziun u il text da la chanzun vegnia repassà ed ha en quel reguard il dretg da decider suletta.

DETERMINAZIUNS DAVART L’INTERPRETA U L’INTERPRET

21. Mintg:a interpret:a accepta tut ils reglaments en connex cun il «Eurovision Song Contest».
22. Nagin:a interpret:a na dastga represchentar dapli ch’in pajais al «Eurovision Song Contest».
23. En cas d’egualitad dals puncts vegnan preferida:s interpret:as ch’èn burgais:as svizr:as u che han in domicil en Svizra. La naziunalitad n’è dentant betg decisiva e n’excluda nagina persuna da chantar, registrar ina chanzun.
24. La vegliadetgna minimala dals interprets è 16 onns (data da tagl: 01-05-2023).
25. Cunquai ch’era chanzuns cun ina vusch da demo pon vegnir inoltradas, sto vegnir inditgà tar l’upload, sche l’interpreta u l’interpret vuless sa participar a la concurrenza u betg.
26. Durant la procedura da selecziun po la SSR da tut temp remplazzar ils interprets, e cun quai las vuschs da las chanzuns, per motivs da qualitad. La SRG SSR decida definitivamain tge interpret:as che chantan tge chanzuns.
27. La participaziun da las victuras e dals victurs da la selecziun svizra per il «Eurovision Song Contest» vegn reglada cun in contract en scrit.
28. Las interpretas ed ils interprets stattan a disposiziun a partir dal schaner 2023 per provas ed il mars/avrigl 2023 per termins da promoziun e provas.
29. Cun suttascriver il contract sa decleran ils interprets liantamain pronts da chantar la chanzun al «Eurovision Song Contest» 2023 e da represchentar la Svizra. Las emissiuns internaziunalas dal mezfinal e dal final han lieu probablamain il matg 2023. L’obligaziun dad esser preschent al lieu da l’occurrenza vala per var duas emnas e dependa dal plan da provas da l’EBU.

LAS EMISSIUNS DIRECTAS AL «EUROVISION SONG CONTEST»

30. Mintg:a interpret:a chanta live sia chanzun. Actualmain vegn partì dal fatg che backing vocals pon esser playback u live (analog 2022). Sulettamain la SSR decida tge varianta che vegn tschernida.
31. La chanzun vegn interpretada plir:as chantadur:as/musicist:as. Maximalmain sis persunas (inclus sautunz:as, musicist:as, backing vocals) dastgan esser sin tribuna.
32. Tut ils instruments èn playback.
33. Sin tribuna n’èn permess nagins animals.
34. Expressiuns, gests u simbols politics, rassistics u che glorifitgeschan la violenza n’èn betg permess
35. La SSR ha il dretg exclusiv da decider davart l’inscenaziun e la direcziun creativa. L’inscenaziun cumpiglia tranter auter vestgadira, choreografia, glisch, LED content.

ULTERIURAS DETERMINAZIUNS

36. L’EBU publitgescha in reglament internaziunal per il «Eurovision Song Contest». En cas ch’il reglament internaziunal sa differenziescha dal reglament naziunal, vala il reglament internaziunal. Mintga regulaziun davart la participaziun al mezfinal respectivamain al final dal «Eurovision Song Contest» 2023, vegn reglada en quest reglament ed è lianta per la victura u il victur da la selecziun naziunala.
37. Contribuziuns che cuntrafan al reglament naziunal u internaziunal vegnan disqualifitgadas da la SSR u da l’EBU.
38. La SRG SSR resalva il dretg da far da tut temp adattaziuns necessarias dal process da selecziun e dal reglament per pudair ademplir la pretensiun da qualitad giavischada.
39. Dretg d’utilisaziun: La SSR po utilisar gratuitamain l’ovra da la contribuziun svizra finala per «Eurovision Song Contest» sin tut ils vecturs (radio, televisiun, online, social media, etc.) senza las minimas resalvas u restricziuns.
40. Dretg d’autur: Mintg:a possessur:a dals dretgs da la chanzun salva ses dretgs a l’ovra. Ils dretgs vegnan quintads giu da la societad da gestiun collectiva (p.ex. SUISA).
41. Avant il 01-09-2022 na dastga la chanzun – u parts da quella – betg vegnir publitgada (radio, televisiun, internet, preschentaziun publica, portatuns, etc.) Davart il termin da publicaziun e la communicaziun en connex cun la contribuziun svizra (incl. titel da la chanzun, interpret e cumponists/auturs dal text) decida la SSR.
42. La SSR resalva il dretg da midar da tut temp il reglament preschent u da l’adattar al reglament internaziunal. Las persunas participadas na pon far valair naginas pretensiuns en consequenza da midadas dal reglament.
43. La via giudiziala è exclusa.
44. I vala la versiun tudestga dal reglament.

Turitg, 12-07-2022

 

Yves Schifferle
Head of Delegation SRG SSR

Schweizer Radio und Fernsehen SRF
Fernsehstrasse 1-4
8052 Zürich
Telefon           +41 44 305 66 11
yves.schifferle@srf.ch